Stangaveiðifélagið Flúðir

Það er að lifna yfir Fnjóská eftir miklar leysingar undanfarnar tvær vikur. Áin er ennþá vatnsmikil og örlítil snjóbráð í henni en orðin vel veiðanleg og fiskur að koma inn á stórstreyminu. Í gær veiddist smálax á Malareyri og sást til fleiri þar sem og í Efra-Lækjarviki þar sem þeir voru að stökkva fossinn upp í Kolbeinspoll. Stóru bleikjurnar eru líka byrjaðar að láta sjá sig og í gær veiddust að minnsta kosti 6 bleikjur á neðsta svæðinu sem voru á bilinu 48-59 cm og nokkrar láku af eftir að hafa tekið roku út í straumharðann strenginn í miðri ánni.

Laxastiginn fylltist af möl í leysingunum en það hefur verið mokað upp úr honum aftur og hann hreinsaður og því greið leið fyrir fiskinn upp í á. Nokkuð öruggt er að einhverjir veiðistaðir hafi tekið breytingum í þessum látum en það er svo sem ekkert nýtt og eykur bara fjölbreytnina. 

Mynd: Daníel Hrafn með 58cm bleikju sem tók Rauðan Frances cone í Efra-Lækjarviki.